Let's go 妙高!

挑戰路線: 川龍--> 妙高台--> 大帽山雷達站--> 大帽山郊野公園--> 川龍

需時: 大約5小時(1小時拍照時間)

難度: 3/5

景色: 4.5/5

由於小妹朝早補習既關係，原本約咗豪仔係12點荃灣等，結果成12點半先到（笑)

好彩使咗佢去買水先，慳翻D時間，然後我地就去咗一間叫北海道牧場餐廳嘅地方食brunch。

烏冬得個幾條，睇見都覺得肚餓sosad

豪仔表示: 杯奶茶好甜

食完呢餐完全冇北海道風味嘅brunch之後，我地就步行去川龍街準備搭小巴了。

咁我地就搭80號小巴去川龍嘅，唔想搭小巴嘅朋友，可以搭51號循環線巴士由荃灣站搭去川龍:) (不過我諗小巴班次密啲)

小巴站係川龍街街頭，咁負責揾路嘅豪仔好明顯冇做好research

帶小妹由街尾行去街頭，再兜咗無數路，先揾到個小巴站 -.,-

未出發，就已經行到攰......

係尾站落車，就可以見到彩龍酒家，靠住右邊行，就開始上山嘅路了YAHOO~

其實上山係有兩段路嘅，一段係車路，行得舒服啲， 一段穿過叢林直爆上響石墳場入口，唔使兜多段車路。

貪圖安逸兼冇骨氣嘅小妹就梗係行車路(笑)

其實行車路都唔使好耐時間，我地大約行咗半個鐘左右就到響石墳場入口，隔離有個溶溶爛爛嘅亭，跟住斜路就開始上妙高台lu~

條斜路都幾斜，差唔多都有４５度，但係都叫做好行既，因為都唔算好多沙石，有啲石級可以跟住咁行。沿途都無咩遮蔭，只係間中有幾棵樹仔係下面抖下，欣賞眾多先人屋企。小妹問豪b點行，結果裝左佢彈弓，搞到佢係咁指人屋企。大概不停行左15分鐘左右既梯級，就順利穿過左響石墳場了。

跟住我地都係繼續上全力上斜，大概每上升100米左右就會有個小平台去休下息影下相。回望番落山既景色都好靚，好值得大家打下卡。比大家睇下影既相啦：Ｐ

睇小妹影到豪仔氣宇軒昂咁 呢啲咪叫照騙(笑)

行上瞭望台個段路可以望到九龍全景~簡直靚到dum一聲呀~!

汗流浹背嘅小妹orz

行到某啲位開始多沙石，無咁好行。由於小妹極度細膽兼畏高，隻重心腳好似唔識郁咁，搞到明明唔係好難行都唔敢行，要豪仔拖住先肯行。咁岩呢一幕俾啲路過既uncle睇度，結果慘遭揶揄。

小妹: 行唔到啊~~!

Uncle 1: 點會行唔到呀? 搭lift上山囉~

Uncle 2:有人係側邊咪話行唔到囉~

小妹: 唔係呀我怕跣>3<"

沿路會見到好多奇岩怪石，都幾有趣ｘｄ

睇下豪仔幾enjoy~

上呢段路雖然又曬又辛苦，但影相真係靚，所以短短一段路行咗成半個鐘Lol

山上面啲草枯囇，成個山頭呈金黃色：

如是者，係行下影下相都係行2個鐘到就已經上到妙高台啦啦啦~

上面好多人係度影相同休息，其中有舊石又平又大舊，成個平台咁，可能就係妙高台既由來了(鳩噏)

山頂嘅瞭望台～

係山頂歇左陣，見到時辰尚早，就心郁郁想行埋前面嘅大帽山。

離遠見到大帽山個波波標誌:P 行個陣仲有陽光曬落黎~

行去大帽山個陣仲見到啲牛牛食緊草haha (牛牛可遠觀而不可褻玩! 記住唔好搞佢地呀!)

接去大帽山個段路其實大部分都係車路黎，落山個陣沿住條車路往荃灣方向行，所以呢段路簡直輕輕鬆鬆鄧梓峰ＸＤ但不得不說，大帽山不愧係香港最高山峰！行上去個陣見到香港山巒起伏真係靚到哇一聲，加埋個日天色時間都岩岩好，落山睇埋日落，簡直係人生一大樂事～

珍惜係香港行山嘅時光~

咁小妹梗係唔執輸，同個日落影返張相先Lmao

上到去個雷達站終於見到傳說中嘅党標語:

厉害了，我的国~

瞻仰完偉大嘅党之後，大約５點幾６點就開始落山。

咁本身我地諗住搭返51號巴士返荃灣市中心嘅，check九巴app見到有排先有車，就諗住行去下一個站（川龍），邊行邊等啦，點知一行就行咗成３、４個字-.,-以為唔夠時間，於是跑咗段路，好不容易跑到個站，但睇返個app候車時間由５分鐘變咗１０分鐘cry等咗好鬼耐都冇車，最尾都係死死氣咁搭返小巴Lmao