一啲都唔曲 之 直必腸嘅彎曲山

挑戰路線: 水浪窩--> 麥理浩徑第四段--> 彎曲山--> 大金鐘--> 昂平高原--> 大水井--> 馬鞍山郊遊徑

需時: 4個半鐘(半個鐘拍照時間)

難度: 3.5/5

景色: 4/5

由於友人嘅極力推薦，加上小妹係Youtube睇咗其他人嘅片，所以就係初一個陣拉咗豪仔陪小妹行彎曲山~

除夕夜豪仔送咗對行山鞋俾小妹，話係情人節禮物，小妹感激涕零之外都有小小心虛，因為小妹並冇準備禮物俾豪仔wuwu於是乎，小妹終於有行山鞋，行步路都自信啲，不過落斜冇得搵跣黎做藉口lu~

我地食完早餐，就去德福總站搭１號小巴去西貢市中心先，車程唔需要好耐，唔塞車嘅話其實20-25分鐘就可以到達西貢。大約1點鐘左右我地就到咗。去ｏｋ買返兩支水，之後行去巴士站轉99號巴士搭幾個站，大約十分鐘之後係水浪窩落車。落咗車之後記住係反方向行喎，如果你直行呢，係會行咗去觀景台嘅。咁個日一向都信佢唔過嘅豪仔不負眾望........咁帶咗小妹行咗去觀景台方向._.好彩小妹自己做咗research，引領豪仔走回正確嘅道路！不過豪仔堅持佢個方向都行到去彎曲山，咁呢樣小妹就唔肯定了~

反方向行一段路仔，就會見到公廁。由於小妹人有三急，就入去解決咗一陣，暢通暢通咗先有力行山架嘛＞＜往前行多幾步呢，就可以見到一塊好大寫住「麥理浩徑第四段」嘅路牌，呢到就係行上去彎曲山嘅起點啦~！

我地兩點開始上山。一開始段路都係啲車路黎，比較易行，仲見到有個伯伯拉住三隻狗狗諗住上馬鞍山opop

沿路指示都好清𥇦，去到一個分差路口會有條小路，轉入去行一段小路就有啲竹樹，就好似竹林咁，小妹都忍唔住係度留下左倩影xd

一路行多陣，見到有人係度係度揸電單車，搞到成陣汽油味，破壞哂山野既空間，仲要搞到啲地都爛哂，諗番起雞公嶺都係咁。好心啦，啲人有番啲公德心啦，想玩就去翻啲合適既場地啦。。。

跟住一路都係沿住麥理浩徑行，從另一個角度睇到西貢啲景色都好靚。右邊望到馬鞍山，呢個角度望落去都幾宏偉。

行到下一個分差路口， 左邊就行去彎曲山，右邊就去馬鞍山，咁我地當然係轉左啦。

由於事先睇左片，知道彎曲山頂落山個段路好多碎石，咁怕死既小妹就拉住豪仔走另一邊唔上山頂啦。況且，啲人影相個好靚度都唔係山頂。

之後行到去好多人影相既山徑，都真係幾靚~左面見到西貢嘅海，右面見到沙田嘅樓（？）

豪仔即刻拎部航拍機，學下上網啲人咁影。不過小妹就怕柒，個度又大風，所以小妹極不合作，搞到豪仔拍左陣就要走xd

附上彎曲山航拍(低清-.,-)一段:

彎曲山之後就係大金鐘，個樣遠睇都好似bell-shape，成個鐘咁，後尾睇番原來都係香港頭５０座高既山:0

上落大金鐘都好斜同急，上既時候小妹都要手腳並用，有時要豪仔推我屎忽推我上去，不過都唔算太高難度，但計返之前行嘅２個幾鐘都幾需要體力。落山既時候，小妹嘅畏高症又發作，見到有兩個女仔係個靚景打卡都唔敢停留，拿拿聲ＳＩＲ落山，最後用左成粒鐘先落番去昂坪，搞到跟住我後面既人都塞哂車ＱＱ 落山個陣仲聽到啲牛叫慶祝牛年ｔｉｍ！

成個Bell咁嘅大金鐘~咁影又唔覺好高:o

可能因為初一既關係，平時爆哂炸既昂坪今日唔算多人，不過都見到有火燒地既痕跡，個草原好禿:( 其實唔好成日話大陸人，香港人好多都好無公德心。

昂坪上的日落~

最後，我地行去大水井方向番西貢，大約行咗15-20分鐘左右就落返地面。行行下豪仔掛住講野，樂極生悲唔小心拗柴ＸＤ跟住搭小巴返西貢市中心，覺得肚餓wuwu於是又去番平時個間吉咗燒賣同腸粉食。

總結彎曲山都幾靚，不過經過大金鐘落山頗具挑戰性，成條路線需要D體力。

P.S. 彎曲山一啲都唔彎XD